​ទួ​គី​៖ ប្រព័ន្ធ​ផ្សព្វផ្សាយ​ប្រទេស​ទួ​គី បានប្រកាស​អាសន្ន​ដោយ​បារម្ភ​ថា រុស្ស៊ី កំពុង​បង្កើន​វត្តមាន​យោធា​របស់ខ្លួន នៅ​ជុំវិញ​ទួ​គី បន្ទាប់ពី​មានការ​បាញ់​ទម្លាក់​យន្តហោះ​របស់​រុស្ស៊ី នេះ​បើតាម​ការចេញផ្សាយ​រប​ស់​សារព័ត៌មាន Hurriyet Daily​។​

​សារព័ត៌មាន​នេះ​បាន​រាយការណ៍​ថា រុស្ស៊ី បាន​បញ្ជូន​ឧទ្ធម្ភាគចក្រ​ចំនួន ១៤​គ្រឿង ទៅកាន់​ប្រទេស​អា​មីនា និង​បាន​ចល័ត​វា​ទៅកាន់​មូលដ្ឋាន​ទ័ពអាកាស Erebuni នៅ​ជិត​រដ្ឋធានី Yerevan កាលពី​ថ្ងៃទី ៨ ខែធ្នូ កន្លងទៅ​។​

​ឧទ​ម្ភា​គ​ចក្រ ៧​គ្រឿង ក្នុងចំណោម​នោះ គឺជា​ឧទ្ធម្ភាគចក្រ​វាយប្រហារ Mi-24 ចំណែក​ផ្សេងទៀត​គឺជា​ឧទ្ធម្ភាគចក្រ​ដឹកជញ្ជូន Mi-8​។ ចំនួន​ឧទ្ធម្ភាគចក្រ Mi-24 នឹង​កើន​ឡើងដល់ ១៥​គ្រឿង នៅ​ចុង​ឆ្នាំនេះ​។​

​ក្តីបារម្ភ​មួយទៀត គឺ​នាវាមុជទឹក​នៅក្នុង​សមុទ្រ​មេ​ឌី​ទែ​រ៉ា​ណេ​។ រុស្ស៊ី បាន​បញ្ជូន​នាវាមុជទឹក​មួយគ្រឿង​ហៅថា «Rostov-on-Dov» បានធ្វើ​ដំណើរ​ទៅកាន់​សមុទ្រ​មេ​ឌី​ទែ​រ៉ា​ណេ កន្លែង​ដែល​រុស្ស៊ី ក៏មាន​មូលដ្ឋាន​ទ័ពជើងទឹក​មួ​យ​កន្លែង​ដែរ ស្ថិតក្នុង​ក្រុង Tartus នៃ​ប្រទេស​ស៊ី​រី​។ នាវាមុជទឹក​នេះ បាន​បំពាក់​មកជា​មួយ​មី​ស៊ី​ល Caliber cruise​។​

​កាលពី​លើក​មុន រុស្ស៊ី​បាន​បញ្ជូន​នាវាមុជទឹក​ពីរ​គ្រឿង និង​កប៉ាល់ Moskva ដែល​បាន​ដឹក​ប្រព័ន្ធ​ការពារ​ដែនអាកាស ស្រដៀង​ទៅនឹង​មី​ស៊ី​ល S-300 ទៅកាន់​ភាគ​ខាងកើត​នៃ​សមុទ្រ​មេ​ឌី​ទែ​រ៉ា​ណេ​រួចមកហើយ​។​

​សារព័ត៌មាន​នេះ ក៏បាន​ផ្តោតទៅលើ​យន្តហោះ​ចម្បាំង​របស់​រុស្ស៊ី នៅឯ​មូលដ្ឋាន​ទ័ពអាកាស Hmeymin ក្នុងប្រទេស​ស៊ី​រី ផងដែរ ដែលជា​តំបន់​ដ៏​រឹងមាំ​មួយ​របស់​ប្រធានាធិបតី បា​ស្យ៉ា អាល់​អាសាដ​។​

​មាន​យន្តហោះ​ចម្បាំង​ប្រហែល ៥៥​គ្រឿង នៅក្នុង​មូលដ្ឋាន​នេះ រួមមាន​យន្តហោះ​ចម្បាំង SU-30, SU-24 និង SU-25, យន្តហោះ​ទម្លាក់​គ្រាប់បែក SU-34 រួម​ជាមួយនិង​ឧទ្ធម្ភាគចក្រ Mi-24 ចំនួន ៧​គ្រឿង និង​ឧទ្ធម្ភាគចក្រ Mi-8 ចំនួន ៥​គ្រឿង​។​

​ចំណែក​ប្រព័ន្ធ​ការពារ​ដែនអាកាស នៃ​មូលដ្ឋាន​នេះ​រួមមាន​មី​ស៊ី​ល Pantsir-S1, Buk-M2, S-200, Pechora-2M និង​កំពូល​មី​ស៊ី​ល S-400 batteries ព្រមទាំង​ប្រព័ន្ធ​រ៉ា​ដា whicymijmh jams ផងដែរ ដែល​ត្រូវបាន​ចល័ត​ទៅកាន់​មូលដ្ឋាន Hmeymin៕

​ប្រភព​៖ mylekha

​